Song til Kviteseidmarken

Varaordførar Olav Mosdøl stod for den offisielle opninga av Kviteseidmarken 2010. Opninga skjedde i utstillingslokala til Kviteseid Kunstforening i Port Arthur i samband med at kunstforeninga opna si markensutstilling. Mosdøl drog dei historiske linjene til den eldgamle Kviteseidmarken, og ynskte arrangørane av årets marken lykke til.  Varaordførar Mosdøl avslutta helsinga si som diktar Mosdøl. Med nyskriven song til Kviteseidmarken fekk han publikum med seg i allsong og urpremiere.

SONG TIL
KVITESEIDMARKEN
FEBRUAR 2010 

Tekst: Olav Mosdøl
Melodi: Mellom bakkar og berg


Kviteseidmarken har røter i tida
hit kom folket frå aust og frå vest,
tradisjonen har halde seg sia
gjennom åra med handel og hest.

Kviteseidbyen fortel mang ei soge
her var futar med skrivar og prest,
og til bygdar kom folket på slede
midt i februars kulde og blest.

Her sprang hestane Kviten og Svarten
Bratli-musen fór Sundkilen lang,
Tofterauden frå Bø fekk pokalen
året etter at byen han brann.

No me feirar med hest og med sluffe
før me samlast på byens kafé,
og til bygdekveld må me nok luffe
for på Sundvang skal målfolk seg gle.

Hundreogfemti år kan me nok rope
når Port Arthur vil syne oss veg,
her er opplegg for små og for store
og utstilling for deg og for meg.

Høyr musikken skal spele ved Brygga
medan folket i Kviteseidby,
kan på Markens-seksaen seg hygga
og sjå fram til ein vinter på ny.